DNO (Dąbrowa Górnicza)

Ich temat: “Mowa ciała”
Przyjechali sam do nos trocha z Dąbrowy Górniczej, a trocha ze Sosnowca… nie chcymy nic godać, ale wiycie, kto tam miyszko. Nojważniejszy tam je taki jedyn Cyba, co je chyba po technikum, bo umi wszystko z niczego porychtować. Jak to godajom bicz z gówna ukrynci. Zawsze majom pełne auto roztomaińtych szpargałów. Na scynie te wszystkie klamory grajom, ale tak grajom, że już my sie pora razy dali za ala zrobić. Jedno jest pewne, że keby Cyba budowoł gruby, to wongiel by som z ziymi wylazowoł a Górnicy by se mogli ze szynku to kontrolować. A jak zaś chodzi o Ryjka to majom
najwiyncyj koryt i w kożdym majom moczka. Ciekawe, co w tym roku napochajom.

Skład: Jarosław Cyba, Adam Mrozowicz, Tomasz Sobieraj, Wojciech Stala.

www.dno.pl

Formacja Chatelet (Kraków)

Ich temat: “Pod wspólnym szyldem”
Nie napiszymy wom nic nowego jak powiymy, że to gryfny kabaret z Krakowa. Kożdy wiy, że tam w Krakowie to jedyn artysta goni drugigo, beztoż z tego Krakowa pitają co by sie kaj indziej pokozać. Terozki u nos chcom zagrać, bo Rybnik im się fest fajnie kojaży bez te nasze fajne dziołszki, a łoni za dziołszkmi to lotajom, że aż sie kurzy. No może nie „Buba”, bo łon jest cołki jakiś dziwny. Godajom tyż, że tu sie czujom jak u siebie w chałpie. To chyba bez te hołdy, bo im się z kopcym Kościuszki kojażom. My jeszcze dla nich na Ryjek załatwili tak, co by w Rybniku prowdziwy hejnalista groł i nawet z łuku se bydom mogli do niego poszczylać. No to łobadomy jakimi łoni wicami do nos poszczylajom.

Skład: Adam Grzanka, Adam Małczyk, Michał Pałubski, Askaniusz Petynka.

www.chatelet.pl

Grupa MoCarta (Warszawa)

Ich temat: “Alegro ma non troppo - ćwierćnuta 140”
Te cztyry chopy przijechały sam do nos, ze stolicy. Może i som to pierońskie warszawioki, ale fest dobrze grajom na roztomańtych krzypcach. Jedyn zaś mo taki krzypce, co mu się chyba kajś we piwnicy rozmokły, bo som pieronym wiynksze łod cołkij reszty. Na tych krzypkach majom nociongnione druty, kiere to nazywają strunami. W drugij rynce trzimiom patyk do kierego przyczepiają
włosie z końskij rzici serwane. Jak się te szkuty dobrze naciongnie, to poradzi tym bele kto na krzypkach zagrać. Nie wiym jak synki chcom muzykom poważnom ludzi rozhajcować, ale życzymy im powodzenia. Aha! Jak se kiery myśli że zagrajom „Ślonski rege” abo „Wodzionka” to niech się w łep klupnie.

Skład: Bolek Błaszczyk, Filip Jaślar, Paweł Kowaluk, Michał Sikorski.

www.grupamocarta.art.pl

Neo-Nówka (Wrocław)

Ich temat: “Najważniejsza jest impreza!"
Te synki na Ryjek, jak już kożdy wiy, przyjechali ze Wrocławia
i to już nie piyrszy roz. Kożdy je ciekawy, co tyż pokożom i komu przygodajom, bo kożdy wie że umiom. Już swego czasu UOP i CBŚ sie na nich rychtowol, a terozki coś ludziska godajom, że ABW na łoku ich mo i że godka ich podsłuchujom. Pewne je to, że szykuje sie pod Klubym Energetyka jakoś haja, bo wszystkie fary się zjyżdżajom z farorzami na czele. Podobno chcom im wklupać, bo sie cały czas faroży czepiajom, a i w niebie coś tam ostatnio zmaszkiecili . A te wszystkie baby w sztrykowanych czopkach juz po
krzokach pochowane czekajom, aż im farorze znak do ataku
dajom. A Paciaciakowo padała że za ta kiecka z ciulu to im
szłapy z rzici powyrywo.

Skład: Radosław Bielecki, Michał Gawliński, Roman Żurek.

www.neonowka.pl

Nowaki (Zielona Góra)

Ich temat: “Nieoczekiwana wizyta”
Te pieruny som ze „Zagłybia”. Zielonogórskiego Zagłybia Kabaretowego a wiadomo już w cołkij Polsce, że łoni tam to wice wydobywajom jak my wongiel, kilkaset tysiyncy roztomańtych wiców rocznie. Nowaki to je taki kabaret co można pedzieć że w tym roku wyjechol na wiyrch i już ło nich wszyndzie godajom, bo roztomańte nagrody pozdobywali. Terozki jeszcze chcom na Ryjku wszystkich
wyonaczyć i se jeszcze do tych roztomańtych klamorów koryta rybnickie dołączyć. No i trzaby tu jeszcze pedzieć, że majom w zespole fest fajno i gryfno dziołszka co fajnie gro. Normalnie jak coś zagro, to jak u nos Bartelowo, niestety boroka nie godo yno mówi. Tak ogólnie to my som fest ciekawi, co tyż oni na tym Ryjku napochajom.

Skład: Ada Borek, Tomasz Marciniak, Kamil Piróg.

www.kabaretnowaki.pl

Paranienormalni (Jelenia Góra)

Ich temat: “Nie lubię świąt”
Synki jak synki. Co by ło nich nie pedzieć, to nie idzie żle godać. Na Ryjku byli rok tymu i tak się im spodobało, ale tak im się spodobało, że latoś tyż sie do nos cisli. A że umiom wice fajnie rychtować, to my ich zaś wziyni, bo na pewno z takimi gupielokami to nasz Ryjek bydzie, jak niy piykniejszy, to na pewno śmiyszniejszy. Łostatnio byli tyż w Ameryce i się okozało, że ta ich „Mariolka” tam została bo tam z kożdym się dogodo i żodyn sie tam z nij nie smieje. Idzie śmiało pedzieć, że terozki jest w doma. Po powrocie to się chopoki fest szykowali na Ryjka, mieli tryningi, a jedyn to przez skecz po sląsku nawet na dół zjechoł. Ponoć jak tam na dole zoboczył szczura to w trzi minuty piechty z szybu wyloz. Coś tam ponoć na dole zaonaczył i może to ze sobom przywiezom. Trza tam sie na nich dować pozor, co tyż w tym roku pokożom.

Skład: Igor Kwiatkowski, Robert Motyka, Rafał Kadłucki, Michał Paszczyk.

www.paranienormalni.com

Smile (Lublin)

Ich temat: “W chińskiej restauracji”
My na nich godomy Lublinioki, ale to nima nic złego bo wiadomo że „lublin” się źle kojarzy jak chodzi o auta, a jak ło kabaret sie rozchodzi to już fajnie. Som to fest fajne synki i złego slowa o nich nie idzie pedzieć. Chocioż już ze dwa razy nas znerwowali, bo jak mieli przyjechac na Ryjka, to jednymu się szłapa popsuła, a potym drugiego zaś tak w dekiel pizło, że zamiast na ryjek to za babom do kościoła polecioł. Ale nima co się na nich onaczyć, trza dać im szansa beztoż tyż my ich na Ryjek wziyni, bo wiymy że chyntnie na
wice z inkszymi kabaretami się bydom klupać. Z pewnego źródła tyż wiymy, że majom pierońskie szmaki na te złote koryta!

Skład: Andrzej Mierzejewski, Paweł Szwajgier, Michał Kincel, Kamil Sochalski

www.smile.art.pl

Tomasz Jachimek (Warszawa)

Jego temat: “Skecz po śląsku”
Tyn gorol przyjechał o dziwo nie z Warszawy, ale z Jabłonny koło Warszawy, czyli jedyn pieron. Ciekawe jest to, że to właśnie on podoł jako swój temat „Skecz po Śląsku”. Nie wiymy, co on tam kombinuje, ale obejrzymy wiela to hanysa w nim siedzi. Mo synek pieronym trudno bo je som do tego wszystkiego, ale zaś geltag łatwij podzielić. Łod czasu do czasu coś tam też w „Szkle kontaktowym” podżisto. Gro tyż fest fajnie w bala, ale nie pytali my go komu kibicuje, co by wcupane, jak sam przyjedzie, nie dostoł. Trza tyż pedziec, że pieruńsko dużo pisze, ale niestety niy po naszymu, chocioż jak go znomy, to je pieruńsko ambitny i na pewno coś tyż po sląsku namaszkeci.

Skład: Tomasz Jachimek, Alicja Jachimek

www.jachimpresents.pl